HATAW! D'yaryo ng Bayan hatawtabloid.com
ni Nonie V. Nicasio
AMINADO ang tinaguriang Teleserye King na si Coco Martin na sobra siyang napabilib kay Sarah Geronimo habang ginagawa nila ang pelikulang Mybe This Time na showing na sa May 28.“Dito sa movie namin, ako ang nabibigla kay Sarah. Kasi noong mga unang araw namin, halos hindi ko siya mahawakan, ‘di ko alam kung paano kami magko-communicate.
“Pero noong mga ilang araw na ang lumilipas, ako na ang nagugulat sa kanya. Kasi may mga eksena kami na… siyempre love story, mayroong mga romance na eksena, siya ‘yung nagsasabi sa akin na, ‘Co, yakapin mo ako.’ Ako naman nagkakaroon ako ng lakas ng loob, kasi siya ‘yung nagsasabi na huwag na ako mahiya,” esplika ni Coco.
Idinagdag pa ni Coco na natutulala siya sa galing dito ng singer/actress. “Sobra akong na-surprise lalong-lalo na sa mabibigat naming eksena, na parang natulala ako dahil sa sobrang galing dito ni Sarah. Parang feeling ko tuloy hindi ako nakaarte e.”
Sinabi pa ni Coco na sobra siyang nag-enjoy sa pelikulang ito.
“Nakakalimutan ko si Sarah… ‘yung character na (niya) ‘yung nakikita namin sa set. Minsan hindi na itinuturo ni Direk kung anong gagawin. Nae-enjoy namin ang harutan at landian.
“Ang sarap niyang katrabaho, ipinapakita niya na pantay-pantay tayo rito,” saad pa ng bidang aktor sa top rating TV series na Ikaw Lamang ng ABS CBN.
Ang Maybe This Time ay mula sa pamamahala ni Direk Jerry Lopez Sineneng. Ito ay kasaysayan nina Steph Asuncion (Sarah) at Tonio Bugayong (Coco). Magkaibang-magkaiba ang dalawa ngunit pareho nilang mahal ang isa’t isa. Bunsod ng mga pangyayaring wala silang kontrol, napilitan silang maghiwalay at magkanya-kanya. Subalit, magkikita sila matapos ang maraming taon upang either tuldukan o muling magsimula ng panibagong kabanata ng kanilang pagmamahalan.
Ang unang tambalan sa pelikula nina Coco at Sarah ay mapapanood na sa May 28. Tampok din dito sina Rufa Gutierrez, Ogie Diaz, Dennis Padilla, Buboy Garovillo, Sharmaine Buencamino, Tony Mabesa,Marlann Flores, Zeppi Borromeo, Alex Castro, Minnie Aguilar,Kathleen Hermosa, Garlic Garcia, Cecil Paz, at Devon Seron.
