HATAW! D'yaryo ng Bayan hatawtabloid.com
ATUBILI MAN, SINAMAHAN NAMIN SI ATE SUSAN SA HIDEOUT NG MGA KUMIDNAP SA ANAK NILA
“Alam ko… Alam ko ‘yan, ‘San…Pero mas makabubuti kung nandito ka lang,” sansala ni Kuya Mar kay Ate Susan.
“Hihintayin ko kayong mag-ama.”
“Makababalik kami rito nang ligtas ng ating anak.”
“M-Mag-ingat ka”
“ ‘Wag kang mag-alala… Kasama ko ang Diyos…” ang tiwalang nasabi ni Kuya Mar kay Ate Susan na inaalipin ng takot.
Pag-alis ng bahay ni Kuya Mar ay lalo kong nakita kay Ate Susan ang matinding pag-aalala. Naroon ang maupo-tumayo siya at magpalakad-lakad sa sala ng kabahayan. Naroon ang mag-akyat-panaog ng bahay. Hindi talaga siya mapakali sa isang lugar.
Dalawang oras na yatang nakaaalis ng bahay si Kuya Mar nang pinuntahan kami ni Joel ni Ate Susan sa aming tulugan.
“Pwedeng samahan n’yo ako…” ang pakiusap niya sa amin ni Joel.
“Saan po?” naitanong ko agad.
“Du’n sa pinuntahan ng Kuya Mar ninyo…”
Hindi namin nagawang tanggihan ni Joel si Ate Susan. Kumuha kami ng taksi sa labasan. At mula roon ay nagpahatid kami sa taxi driver sa lugar na pinaroonan ni Kuya Mar kung saan naroroon din sina SPO4 Reyes at SPO3 Sanchez.
Pinapara ni Joel ang taksi sa isang lugar na malayu-layo pa sa lugar na alam kong pino-postehan nina SPO4 Reyes at SPO3 Sanchez at tiyak na kinaroroonan na rin ni Kuya Mar. Naglakad na lang kami sa paglapit sa kanila. At natatanaw pa lang namin silang tatlo ay naulinigan ko na ang pakikipagtalo ni Kuya Mar sa dalawang pulis na kasama niya.
“Papasok ka sa loob ng bahay na bato? Baka nalilimutan mo, trabaho na namin ‘yan. Police matter na ‘yan…” ang pagkumpas-kumpas ng mga kamay ni SPO4 Reyes sa pakikipag-usap kay Kuya Mar.
“Gusto kong ipaalala rin sa ‘yo na anak ko ang kinidnap ng sindikato. At bilang ama, karapatan kong pangalagaan ang kanyang se-guridad,” ang pagtataas-boses ni Kuya Mar kay SPO4 Reyes.
“ ‘Wag na kayong magtalo… Okey? Ibabato ko na mamaya sa NBI at PDEA ang tungkol sa drug operation ng sindikato sa eryang ito para makahingi tayo sa kanila ng back-up,” singit naman ni SPO3 Sanchez. (Itutuloy)
ni Rey Atalia
