Yaya naligis ng matuling SUV sa makipot na kalye

NAMATAY ang  28-anyos  yaya nang araruhin ng sports utility vehicle (SUV) habang naglalakad  sa makipot na kalye ng Protacio, sa Pasay City kamakalawa ng gabi.

Isinugod sa Pasay City General Hospital ang biktimang si Laila Opiana, ng 2628 Cabrera St., pero binawian din ng buhay habang ginagamot ng mga doktor sanhi ng matinding pinsala sa ulo at katawan.

Sa imbestigasyon ni PO3 Margarito Agas ng Pasay Police Traffic Management Unit, naglalakad si Opiana patungo sa tindahan malapit sa 74thStreet para bumili ng mineral water nang mabundol ng Toyota Fortuner (NLQ-963) na minamaneho ni Hazel Mallari Chilton, 35, ng 20-A Joaquin St., San Lorenzo Village, Makati City.

Sa tindi ng pagkakabundol, nakaladkad pa nang ilang metro ang biktima hanggang maipit  sa konkretong poste ng gate sa isang bakanteng lote.

Kusang loob na sumuko sa pulisya si Chilton at nakatakdang sampahan ng kasong reckless imprudence resulting in homicide at damage to property.

ni JAJA GARCIA