UAAP Season 77 magbubukas sa Hulyo 12

PUSPUSAN ang paghahanda ng University of the East sa pagiging punong abala ng ika-77 na season ng University Athletic Association of the Philippines sa Hulyo 12 sa Smart Araneta Coliseum.

Sa lingguhang forum ng Philippine Sportswriters Association (PSA) sa Shakey’s Malate kahapon, sinabi ng secretary-treasurer ng UAAP na si Rodrigo Roque na nagsisimula na ang pag-rehearse ng mga estudyante ng pamantasan para sa opening ceremonies ng liga.

Si Derrick Pumaren ang bagong coach ng UE pagkatapos na sibakin ng pamantasan si Boysie Zamar.

Maghaharap ang UE Warriors kontra University of the Philippines Maroons sa unang laro sa alas-2 ng hapon pagkatapos ng opening ceremonies sa alas-12 ng tanghali samantalang maglalaban ang defending champion ng men’s basketball na De La Salle University at ang Far Eastern University sa alas-4.

Bukod kay Pumaren, ang iba pang mga bagong coaches ng UAAP men’s basketball ay sina Kenneth Duremdes ng Adamson, Segundo de la Cruz ng UST at Rey Madrid ng UP.

(James Ty III)