HATAW! D'yaryo ng Bayan hatawtabloid.com
NAGBARIL sa sarili ang 60-anyos American national sa loob ng firing range ng Makati Cinema Square kahapon ng hapon sa nasabing siyudad.
Kinilala ni Makati City Police chief, Sr. Supt. Manuel Lukban ang biktima sa pamamagitan ng kanyang pasaporte na si Jeffrey Allen Klein tubong California.
Napag-alaman, dumating ang biktima sa Makati Cinema Square at pumasok sa firing range upang mag-target shoot, nang makaubos ng ilang bala muling nagpakuha sa namamahala ng target board.
Nang makaalis ang nag-assist sa biktima upang kumuha ng target board, narinig na lamang niyang biglang may pumutok at pagkaraan ay nakita niyang bumulagta ang dayuhan na duguan.
Napag-alaman, nahagip ng video camera na nakakabit sa Jethro Firing Range sa basement ng Makati Cinema Square, ang ginawang pagbaril sa sarili ng dayuhan dakong 4:12 p.m. habang kumukuha ng target paper ang range assistant.
Sa inisyal na ulat ng pulisya, nakita sa CCTV footage ang pagkuha ng .9mm ng dayuhan na nakalagay pa sa kahon at itinutok sa bunganga bago kinalabit ang gatilyo.
Sinabi ni Senior Supt. Lukban, aalamin nila kung may pananagutan ang pamunuan ng firing range sa naturang insidente. (JAJA GARCIA)
