HATAW! D'yaryo ng Bayan hatawtabloid.com
ni ED DE LEON
TALAGANG malungkot ang nangyari sa buhay ni Wowie de Guzman. Isipin ninyong kapapanganak pa lamang ng kanyang asawa, namatay na agad iyon. Matapos daw na manganak ay naging unstable na ang blood pressure ng kanyang asawang si Sheryll Ann Reyes. Nang minsan daw na sumama ang katawan niyon ay uminom lamang ng karaniwang gamot, pero pagkatapos niyon ay lalong sumama ang pakiramdam. Isinugod nila iyon sa ospital pero hindi na nga na-revive. Nakaburol iyon ngayon sa kanilang tahanan sa Lubao, Pampanga, at si Wowie hindi pa rin makausap dahil sa labis na paghihinagpis dahil sa nangyari sa kanyang asawa.
Simula nang magpakasal sila ay iniwan nga ni Wowie ang showbusiness, nagsikap sa negosyo para sa kanyang pamilya. Matapos magkaroon ng unang anak, nawala naman ang kanyang asawa. Isang buwan pa lamang ang anak nila.
Siguro nga hindi na madarama ng kanilang anak ang sakit ng nangyari, dahil wala pa naman iyong malay, pero matinding dagok talaga iyan para kay Wowie. Mahirap ding mawalan ng partner sa buhay, lalo na nga ngayong may isang anak na kailangan pa niyang pangalagaan.
