HATAW! D'yaryo ng Bayan hatawtabloid.com
UMABOT na sa apat ang mga napatay na bilanggo habang tinatayang nasa 20 katao ang sugatan sa naganap na protesta ng mga preso sa provincial jail sa Lucena City, sa Quezon province kahapon ng umaga.
Kinilala ni Lucena City Police chief, S/Supt. Allen Rae Co, ang mga namatay na sina Gary Esguera, Jose Umali Escasa, Cristian Contemplacion, at Manuelito Palma.
Ang protesta ay nag-ugat sa paglilipat sa ibang selda sa ilang mga bilanggo.
Naglagay ng barikada ang mga preso upang pigilan ang paglilipat hanggang magresulta sa barilan gamit ang improvised na armas ng mga bilanggo.
Kabilang din sa mga sugatan ang ilang sibilyan na bumibisita lamang sa bilangguan.
Isinugod ang mga sugatan sa Quezon Medical Center. Karamihan sa kanila ay na-trap sa piitan nang maganap ang tensyon.
Ayon sa BJMP at PNP Lucena, kontrolado na ang sitwasyon sa loob ng bilangguan.
(RAFFY SARNATE)
