Parks umalis na sa NLEX

KINOMPIRMA kahapon ng team manager ng North Luzon Expressway na si Ronald Dulatre ang pag-alis ng isa sa mga pambato ng Road Warriors na si Bobby Ray Parks patungong Amerika upang atupagin ang kanyang balak na maglaro sa NBA.

Ayon kay Dulatre, malaking kawalan para sa NLEX si Parks dahil sa mga kontribusyon niya sa koponan na hanggang ngayon ay wala pang talo sa PBA D League Foundation Cup.

Umalis na si Parks noong Abril 30 pagkatapos na tapusin niya ang kanyang pag-aaral sa National University.

“When we got Rayray, he told us of his future plans and we support whatever he does,” wika ni Dulatre. “We will be happy for him if he does join the NBA.”

Naunang sinabi ni Parks na nais niyang makatapak sa NBA bilang pangako niya sa kanyang yumaong amang si Bobby Parks, Sr. na namatay dahil sa kanser noong isang taon.

Dahil sa pangyayaring ito, malabong makasali si Parks sa PBA Rookie Draft sa Agosto kung saan isa sana siya sa mga manlalarong kukunin ng NLEX para sa una nitong kampanya bilang expansion team ng liga sa susunod na season.

“Right now, we are still awaiting word from the PBA board on what kind of concessions we will get for our PBA team,” ani Dulatre.   (James Ty III)