Japanese trader dedo sa tandem

DEDBOL ang isang Japanese trader  nang pagbabarilin ng rider in tandem habang nagmamaneho ng kanyang kotse kamakalawa ng gabi sa Parañaque city.

Patay noon din ang biktimang si Hiroshi Iwasaki, 49-anyos, negosyante, ng 51 Don Santiago Freixas Street, Alabang, Muntinlupa City.

Sa ulat ni SPO1 Israel Perez, imbestigador, kay Supt. Ariel Andrade, dakong 9:25 p.m. nang mangyari ang pamamaril sa Dr. A. Santos Avenue, Barangay San Antonio.

Sa ulat, minamaneho ng biktima ang kanyang Nissan Exalta (XEA-602) at mag-u-turn patungong BF Homes nang bumaba ang lalaking nakaangkas sa kulay itim Yamaha Mio motorcycle na walang plaka at binaril sa ulo si Iwasaki ng kalibre .45 baril.

Nabatid na si Iwasaki ay may-ari ng Fresh Tour Incorporated, sa Dusit Hotel, Makati at matagal nang naninirahan sa bansa, kasama ang mga anak at asawang Filipina.

Inaalam na ng pulisya ang motibo sa pagpatay at pagkakakilanlan sa dalawang suspek na posibleng killer for hire. (JAJA GARCIA)