Jordanian arestado sa extortion

PATONG-patong na kaso ang isinampa laban sa Jordanian national na nangikil sa isang Pinay na nag-apply papuntang Dubai at tangkang paglaban sa isang pulis Maynila, kamakalawa ng hapon.

Nakapiit na sa Manila Police District-General Assignment Section (MPD-GAS), ang suspek na si  Salah Jomuah Sulaiman Abou, alyas Sammy Sara, 52, ng 801 Craig St., Sampaloc.

Inireklamo ang suspek nina Hazel Quinto, 36; Janette Collado, 26; ng 1207-G Tayabas St., Tondo,  at ni PO1 Gilbert Lim, ng MPD.

“Nainip na kasi ang pamangkin ko sa pangako ni Sammy na makaaalis na siya papuntang Dubai, kaya binawi na ‘yong kanyang passport at nakipagkita sa Robinson’s kapalit ng P3,500,” ani Quinto.

Nabatid na nagkita sa Robinson’s si Collado at ang suspek para mabawi ang pasaporte. Akmang ibibigay na ni Collado ang pera kay Sara pero inawat siya ni Quinto.

“Nagalit siya, sinuntok niya ako sa likod, minura ng ‘p…ina ka, bobo ka,’ kaya napasigaw ako sa sakit,” salaysay  ni Quinto.

Nakita ni PO1 Gilbert Lim ang komosyon kaya nilapitan niya ang tatlo pero isinalya siya ng suspek at sinabihan pa ng “Abnormal, abnormal where is your ID!”

Dahil dito, agad pinosasan ni Lim ang nanlalaban na suspek at saka dinala sa MPD-GAS.

Nahaharap  sa kasong illegal recruitment, scandal and alarm, phy-sical injury, robbery extortion at resisting arrest ang suspek sa Manila Prosecutors’ Office.

(leonard basilio, Camille I. Bolos, Nikki-Ann Q. Cabalquinto, Antonio C. Maaghop, jr., Bhenhor M. Tecson, Lara Liza M. Singson)