Anak ng ex-mayor dedbol kay utol

CAUAYAN CITY, Isabela – Away sa lupa ang pangunahing tinitingnang anggulo ng Luna Police Station sa pagsaksak at pagpatay sa isang lalaki kahapon dakong 1 a.m. ng kanyang ka-patid sa Luna, Isabel.

Kinilala ang biktimang si Jose Beltran, 55, habang ang suspek ay si Pedro Beltran, 60, kapwa residente ng Centro Uno, Luna Isabela. Sila ay mga anak ng dating mayor ng Luna, Isabela.

Sa imbestigasyon ng Luna Police Station, nakaparada ang sasakyan ni Jose nang pasukin at pagsasaksakin ng suspek ang biktima.

Bukod sa pananaksak ay pinukpok din ng bato ni Pedro ang ulo ng kanyang kapatid.

Tinamaan ng pitong saksak sa katawan ang biktima at may sugat sa ulo sanhi ng pagpukpok ng bato.

Inihayag ni Sr. Insp. Edgar Pattaui, ang hepe ng Luna Police Station, pinaaalis ni Jose ang kapatid na si Pedro sa kanyang lupain sa Centros Dos, Luna at dito nag-umpisa ang alitan ng dalawa na humantong sa krimen.

Agad naaresto ang suspek na kakasuhan ng murder.

(BETH JULIAN)