HATAW! D'yaryo ng Bayan hatawtabloid.com
NGAYONG ganap nang state witness si Madame Ruby Tuason at nagsoli pa ng P40 milyones, tuluyan na kayang ma-swak sa hoyo sina Senators Juan Ponce Enrile, Jinggoy Estrada at Bong Revilla?
Sa dami ng ebidensiyang hawak ng Department of Justice (DoJ) sa Ombudsman, ayon kay Secretary Leila De Lima, nakahanda na silang ihain ang demanda.
‘E nasaan na!?
Nagtataka lang tayo kung bakit ang daming sinasabi ni Secretary De Lima pero hanggang ngayon ay malayang-malaya pa rin ang tatlong Senador.
Pero araw-araw ay inuupakan sila sa media.
In fairness sa tatlong Senador, kailangan na talaga nilang gumulong ang katarungan para naman malinis rin nila ang kanilang pangalan.
Kung sangkot naman talaga sila ‘e kailangan na ng KATARUNGAN ng sambayanan.
Bilis-bilisan n’yo rin ang pag-aasikaso sa kasong ‘yan Ombudsman Conchita Carpio Morales, kasi marami ang naghihinala na ginagamit lang ‘yang P10-billion pork barrel scam para asintahin ang mga kalaban ng administrasyon.
E kung hindi pa maisasampa ‘yan sa Sandiganbayan, kahit mayroon nang state witness, baka maniwala ang mamamayan na pinaiikot n’yo lang ang sambayanan para sa 2016 presidential election.
‘Wag na ninyo i-apply d’yan ang NOYNOYING!
DALAWANG QCPD KOTONG COPS TIMBOG KAY SINDAC
‘YAN na nga ba ang sinasabi natin … hinay-hinay lang mga COPS na gustong magdelihensiya lalo na kung nasa area kayo ng mga taong alam nila kung ano ang kanilang mga karapatan.
Kung may ginawa talagang paglabag sa batas, dalhin sa presinto at sampahan ng kaso. ‘E kaso umaare-areglo pa, ‘yan mismong si PNP Spokesperson Chief Supt. Theodore Ruben Sindac pa mismo ang nakatimbog sa inyo.
Sa halagang P4,000 ay na-swak sa extortion at mukhang masisibak pa ang mga pulis na sina PO1 Roland Mansibang at PO1 Ronaldo Englis, kapwa naka-deploy sa QCPD Galas police station.
By the way, noon pa ay marami na tayong natatanggap na reklamo gaya ng pangongotong at hulidap sa ilang pulis sa QCPD-Galas station. Pakitutukan mong mabuti Gen. Richard Albano, ang estasyon na ‘yan at baka sumabit ka pa d’yan.
Nitong nakaraang Martes ng gabi, ang 22-anyos na si Rodolfo Eduardo Santiago kasama ang kanyang girlfriend ay naka-park sa 8th Street sa New Manila, Quezon City.
Nilapitan sila ng dalawang pulis na sina Mansibang at Englis, kinatok ang bintana at tinutukan ng ilaw ng flashflight sa bintana.
Pinalalabas si Santiago sa kanyang sasakyan at hiningi ang kanyang lisensiya.
Saka sinabihan si Santiago na sasampahan sila ng kaso ng kanyang kasamang babae ng public scandal at magmumulta ng P20,000.
Ayon kay Santiago, tinanong niya si Mansibang bakit sila magmumulta ng P20,000. Sinabi umano ni Mansibang na kung ayaw nilang maeskandalo at makarating sa media ang pangyayari ‘e kailangan nilang maglabas ng P20,000.
Agad sinabi ng biktima na wala siyang ganoon kalaking halaga, kaya tinanong sa kanya kung magkano ang nasa wallet niya. Sinabi niya P4,000 pero inutusan daw siya mag-withdraw pa sa ATM.
Sa pagkakataong iyon, tinawagan na ni Santiago si Gen. Sindac, na nagkataong tatay ng kanyang kaklase noong college.
Nang sinabi ni Santiago kay Mansibang na kausap niya si Gen. Sindac, inakala ng pulis na bina-bluff lang siya ng biktima kaya inutusan na nila na magpunta sa Greenhills Town Center sa Granada St., Barangay Valencia , doon sila sinalubong ng iba pang pulis.
Sa pagkakataong iyon, dumating ang kanyang pamilya kasama si Gen. Sindac.
Matapos kausapin sina Mansibang at Englis, agad iniutos ni Sindac sa dalawa at sa iba pang pulis na agad silang mag-report sa QCPD-CIDU.
Inutusan din niya si Albano na imbestigahan ang insidente para tuluyang sibakin ang dalawang pulis dahil sa kanilang tangkang pangingikil.
‘Yun na! Swak na!
Kudos Gen. Theodore Sindac!
Para sa mga reaksiyon, suhestiyon, reklamo at sumbong, magtext sa 0915.804.76.30 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
