HATAW! D'yaryo ng Bayan hatawtabloid.com
LEGAZPI CITY – Matagal nang alitan sa pamilya at away sa lupa ang tinitignang anggulo ng mga awtoridad sa pagmasaker sa isang pamilya sa Brgy. Togbon, Oas Albay kamakalawa.
Kinilala ang mga napatay na ang mag-amang sina Pavian Rectin Sr. at Pavian Rectin Jr., kapwa agad binawian ng buhay makaraan pagtatagain.
Habang kritikal sa ospital ang mag-ina ni Rectin Sr. na sina Virgenia at Jobert, nagawa pang makatakas sa kabila ng matinding tama sa katawan.
Sa inisyal na imbestigasyon ng pulisya, bigla na lamang sumugod sa bahay ng mga biktima ang mga suspek na kinilalang sina Sadik at Sajid Roaring, at Betran at Rolex Rellama na mula sa parehong bayan at mga pamangkin ng mag-asawa.
Ayon kay Oas Municipal Police Station investigator SPO2 Harold Reolo, halos hindi na makilala ang mga biktima dahil sa matinding tama sa ulo, mukha at katawan mula sa pananaga.
Nakuha sa crime scene ang dalawang improvised shotgun at itak na ginamit ng mga suspek.
Sa ngayon, nagpapatuloy pa ang operasyon ng mga awtoridad sa pagtugis sa mga salarin na mabilis tumakas makaraan ang krimen.
