HATAW! D'yaryo ng Bayan hatawtabloid.com
KALABOSO ang wanted sa batas na Chinese national, nang masakote sa buy-bust operation ng Philippine Drug Enforcement Agency (PDEA) kamakalawa sa Sta. Cruz, Maynila.
Kinilala ni PDEA Director General Arturo Cacdac, Jr., ang suspek na si Yi Xin Li alyas Johnny Go, 40, may-asawa, residente ng unit 1902 Broadview Condominium sa Masangkay St.
Sa ulat, dakong 9:30 p.m. nagsagawa ng entrapment operation ang PDEA sa tinutuluyan ni Li sa pangunguna ni agent Al Vincent Delgado at John Cortez.
Napag-alaman na nagpanggap ang isa sa mga ahente ng PDEA bilang buyer at bumili ng shabu na nagkakahalaga ng P1,000 sa suspek.
Nang maiabot ang marked money sa suspek kapalit ng shabu na ibinenta nito, dito siya sinakote ng mga operatiba.
Bukod sa ibinentang shabu ng suspek, nasamsam din sa kanyang tinitirhan ang 300 gramong shabu na nagkakahalaga ng P600,000.
Nabatid na may nakabinbing kaso sa droga ang suspek sa ating bansa maging sa China at nasa wanted list ng PDEA.
(JETHRO SINOCRUZ)
