Sarah Lahbati, may bagong proyekto sa labas ng GMA

PAGKATAPOS ng unos sa kanyang career, nagbabalik na ang dating sigla ni Sarah Lahbati.

Nakita namin si Sarah kasama ang kanyang BF na si Richard Gutierrez na nanood ng laro ng Ginebra at Rain or Shine sa PBA sa Araneta Coliseum noong Easter Sunday at tila nag-e-enjoy sila sa aksiyon sa court.

At sa pagiging sweet na sweet sa isa’t isa, masasabi natin na malaki ang naitulong ni Richard para maayos ni Sarah ang kanyang sigalot sa kanyang kontrata sa GMA Artists Center.

Matatandaang biglang umalis si Sarah para magbakasyon sa abroad at dahil dito, inihabla siya ng pangulo ng GMA Films na si Annette Gozon-Abrogar.

Ngunit nagdesisyon si Sarah na bumalik sa Pilipinas upang ipagpatuloy ang showbiz career at pagkatapos na ayusin na ang kanyang problema sa management ng GMA ay nakabalik na siya sa trabaho.

Katunayan, kinompirma ni Sarah na nag-taping siya ng isang bagong made-for-TV-movie para sa TV5 kasama si Alice Dixson.

More Than Words ang titulo ng nasabing pelikulang handog ng Studio5 Originals at makakasama rin nina Sarah at Alice sina Ariel Rivera at Jackie Lou Blanco.

Ipalalabas ang nasabing telesine sa Mayo 11, Linggo, sa TV5 simula 9:15 p.m..

“It’s about a mother-and-daughter relationship. Tita Alice is my mom here,” say ni Sarah sa aming pakikipag-usap sa kanya. ”I’m grateful to GMA for letting me do this project and I’m also thankful to TV5 kasi first time ko na gumawa ako ng ganitong klaseng role. It’s a new and exciting experience for me.”

Tungkol sa kanyang relasyon kay Richard, sinabi ni Sarah na magandang pagkakataon para sa kanila na manood ng basketball para mag-relaks at mag-bonding.

Pagkatapos ng telesine sa TV5 ay gagawa si Sarah ng bagong teleserye sa GMA ngunit habang wala pang senyales upang mag-taping ay mapapanood muna siya sa tuwing Linggo ng tanghali.

ni  James Ty III