HATAW! D'yaryo ng Bayan hatawtabloid.com
NAARESTO ang isang miyembro ng carnapping group na kumikilos sa Bulacan nang sitahin dahil sa pagmamaneho ng motorsiklo nang walang suot na helmet sa Brgy. Poblacion, Sta. Maria ng nasabing lalawigan kamakalawa.
Ang suspek na si Joseph Nicolas, 24, residente ng Garden Village sa Brgy. Pulong Buhangin sa nabanggit na bayan, may nakabinbing kaso ng carnapping sa sala ni Judge Victoria Fernandez-Bernardo ng RTC Branch 19 sa Malolos City.
Sa ulat ng pulisya, dakong 2:30 p.m. nang parahin ng mga awtoridad si Nicolas dahil sa paglabag sa “no helmet-no ride policy” ngunit imbes huminto ay nilagpasan ang checkpoint kaya hinabol ng mobile patrol.
Nang maabutan ay natuklasan ng mga awtoridad na walang kaukulang papeles ang motorsiklo at sa imbestigasyon ay nabatid na kabilang sa mga pinaghahanap ng batas ang suspek. (DAISY MEDINA)
