HATAW! D'yaryo ng Bayan hatawtabloid.com
TATLONG Filipino nurses ang panibagong biktima ng Midde East Respiratory Syndrome coronavirus (MERS-CoV).
Ang tatlong Filipino ay kinabibilangan ng 28-anyos babaeng nurse na nagtatrabaho sa Dr. Sulaiman Al-Habib Hospital sa Riyadh, Saudi Arabia.
Ngunit hindi siya nakitaan ng ano mang sintomas ng virus.
Ang dalawa pang Filipino na nagpositibo rin sa MERS-CoV ay kapwa nagtatrabaho sa Al-Noor Hospital sa Makkah.
Ang isa sa kanila ay 40-anyos babae na nagkaroon ng contact sa pasyente na nakapitan ng virus ngunit hindi rin nakitaan ng ano mang sintomas.
Habang nagkaroon ng mild respiratory symptoms ang 30-anyos Filipino nurse na nakuha ang virus sa pasyenteng nagpositibo sa MERS, ngunit ngayon ay stable na ang kalusugan.
Kabilang ang tatlong Filipino sa 14 bagong kaso ng MERS-CoV na naitala sa Saudi Arabia.
Ayon sa Saudi Ministry of Health, umaabot na sa 92 ang namatay sa coronavirus sa nasabing bansa.
Sa kabila nang patuloy na pagdami ng kaso, tiniyak ng Saudi government na hindi pa nagiging epidemya ang naturang sakit.
Nag-alok ang World Health Organization ng pagpapadala ng mga eksperto sa Saudi upang mag-imbestiga sa “evolving risk” ng pagkalat ng virus.
(LAYANA OROZCO)
