2 utas, 4 sugatan sa ratrat ng tandem

BUMUWAL na walang buhay ang dalawa katao, kabilang ang isang babae, nang ratratin sa kalagitnaan ng kanilang inoman sa Masbate City kamaka-lawa.

Kinilala ang mga namatay na sina Ricardo Padilla at Norma Andaya, habang malubha ang kalagayan sa Masbate City Provincial Hospital sina Rose Andaya, Edna Garganta, Rezyl Andaya at Lito Garganta, pawang residente ng Sitio Circulo ng nasabing lungsod.

Samantala, patuloy na inaalam ng mga awtoridad ang pagkakakilanlan ng dalawang suspek na tumakas sakay ng kanilang motorsiklo makaraan ang pamamaril.

Base sa ulat ng Masbate City PNP sa Police Regional Office (PRO) 5 Camp Simeon Ola, naganap ang insidente dakong 9:50 p.m. sa nabanggit na bisinidad.

Sinasabing habang nag-iinoman ang grupo, biglang huminto ang isang motorsiklo at walang sabi-sabing pinaputukan sila ng mga suspek.

Kasalukuyan wala pang alam ang pulisya kung ano ang ugat ng krimen at sino-sino ang responsable sa insidente. (JETHRO SINOCRUZ)