HATAW! D'yaryo ng Bayan hatawtabloid.com
NAGA CITY – Isinasailalim na sa counselling ang magkapatid na nakasaksi sa pagpatay sa kanilang lolo’t lola sa Brgy. B-Titong sa Masbate City.
Ayon kay Chief Insp. Edwin Adora ng Masbate City Police, kabilang sa magkapatid ang 19-anyos dalagita na halinhinang ginahasa ng dalawang holdaper.
Batay sa salaysay ng magkapatid, dakong 6 a.m. kamakalawa habang abala ang lolo at lola nilang sina Eddie at Nelly Verano nang biglang pumasok ang mga suspek.
May dala aniya baril ang mga suspek na itinutok sa mag-asawa at nagdeklara ng holdap habang iginapos ang magkapatid.
Dahil sa takot ay agad ibinigay ng mag-asawa ang perang nagkakahalaga ng P3,000.
Ngunit nagtangkang humingi ng tulong ang mag-asawa kaya tinadtad ng saksak ng mga suspek hanggang sa mamatay.
Pagkaraan ay halinhinang ginahasa ang isa sa magkapatid.
Sa kwento ng magkapatid, nakatakip ang mukha ng isa sa mga suspek habang ang isa ay kanilang namukhaan dahil walang ano mang takip sa mukha.
Napag-alaman, matagal nang naninirahan ang magkapatid sa kanilang lolo’t lola dahil nagtatrabaho ang kanilang mga magulang sa Maynila.
Sa ngayon, may lead nang sinusundan ang mga awtoridad at tiniyak na mahuhuli ang mga suspek sa lalong madaling panahon.
(LANI CUNANAN)
