HATAW! D'yaryo ng Bayan hatawtabloid.com
NAPATAY sa gulpi ng isang dating pulis ang isang babae nang umatake ang pagiging selosa kamakalawa ng gabi sa Caloocan City.
Kusang-loob na sumuko sa pulisya ang suspek na si retired SPO3 Longino Catalan, 67-anyos, ng 3-B Rivera Compound, Talipapa, Brgy. 164 ng nasabing lungsod, nahaharap sa kasong murder.
Agad nalagutan ng hininga sa matinding bugbog sa katawan at nabagok ang ulo ng biktimang si Gina Ortiz, nasa hustong gulang, ng nasabi rin lugar.
Batay sa ulat ni PO2 Edgar Manapat, dakong 11:30 p.m. nang maganap ang insidente sa bahay ng suspek.
Nagtalo ang dalawa dahil sa pagseselos ng biktima bunsod ng pagiging babaero ng suspek.
Pagkaraan ay biglang tinuhod ng biktima sa pagitan ng mga hita ang suspek na naging dahilan upang magdilim ang isip ng lalaki kaya siya ay pinagsusuntok hanggang sa matumba.
Nabagok ang ulo ng biktima na naging dahilan ng kanyang kamatayan.
(ROMMEL SALES)
