HATAW! D'yaryo ng Bayan hatawtabloid.com
ARESTADO sa Traffic Enforcement Unit ng Maynila ang tauhan ng Philippine National Police nang kanilang holdapin ang mag-asawang negos-yante sa Roxas Boulevard, Maynila, iniulat kahapon.
Kinilala ang suspek na si PO2 Argel Nabor, 27, ng 317 Mabini St., Sampaloc, Maynila, nakatalaga sa Northern Police District (NPD).
Sa ulat, nakatakas ang sinasabing tatlong kasama ni Nabor at tinutugis ngayon ng mga awtoridad.
Ayon sa mga biktimang sina Apolinario Yla-ga, 42, at kabiyak na si Guillerma, 42, negosyante ng mga alahas, ng 754 San Bernardo Street, Sta. Cruz, Maynila, binabagtas nila ang Roxas Boulevard kanto ng Quirino Avenue, Malate, nang sila’y harangin ng mga suspek nakasakay sa motorsiklo at Toyota Hi-Lux (TIC 964) kulay gray.
Sa kuwento ng mga biktima, tinutukan sila ng baril ni Nabor, saka inagaw ang shoulder bag na may laman P200,000 cash, isang kuwintas, isang set ng Illusion bag naglalaman ng alahas na umaabot sa halagang P700,000.
Agad nakahingi ng tulong ang mag-asawa sa Manila District Traffic Enforcement Unit –MDTEU na nagresulta sa pagkakadakip ng suspek.
Nakompiska sa suspek ang isang Taurus Pistol 9mm (PT #111PRO SA, serial TAV15026 ) na nakarehistro sa isang Ada Michelle Elleusada, na may magazine load (33) at tatlong bala ng kalibre 38, isang iPhone China at isang unit ng Nokia.
Sa ulat, bitbit ng mga nakatakas na kasama ni Nabor ang bag ng mga biktima na naglalaman ng mga alahas at cash.
(ni Leonard Basilio May kasamang ulat nina Camille I. Bolos, Nikki-Ann Q. Cabalquinto, Antonio C. Maaghop, jr., Bhenhor M. Tecson, Lara Liza M. Singson)
