Armoury naitala ang ikaanim na panalo

Naitala ang ikaanim na panalo ng kabayong si Armoury at hinete niyang si Cris Reyes nung isang gabi sa pista ng SLLP.

Sa largahan ay mabilis na umarangkada ang kanilang tambalan dahil sa angking tulin na namana sa kanyang mga magulang na sina Stone God at Spear Heads. Pagsungaw sa rektahan ay inalalayan na lamang ni Cris ang kanyang sakay dahil nalingunan niyang malayo na sila sa peligro hanggang sa makarating sa meta.

Ayon pa kay Cris ay masusundan pa ang kanilang mga panalo basta huwag lang magbago ang kundisyon ni Armoury. Naorasan sila ng 1:31.5 (13’-24-26-28) sa 1,400 meters na distansiya.

Fred L. Magno