HATAW! D'yaryo ng Bayan hatawtabloid.com
NAIS ng San Miguel Beer na makaiwas sa playoff kung kaya’t itotodo nito ang lakas kontra Air 21 sa kanlang sagupaan sa PLDT Home TVolution PBA Commissioner’s Cup mamayang 8 pm sa Smart Araneta Coliseum sa Quezon City.
Ang Beermen ay may 7-2 karta at sumesegunda sa Talk N Text na nagtapos nang may 9-0. Sa ilalim ng tournament rules, ang top two teams ay magkakaroon ng twice-to-beat advantage sa quarterfnals.
Nais ng Beermen na mapanatili ang kapit sa No. 2 spot at huwag abutan ng defending champion Alaska Milk (5-3).
Makakatabla ang Aces kung tatalunin nila ang San Mig Coffee sa Linggo.
Sina coach Biboy Ravanes at active consultant Todd Purvis ay sumasandig sa import na si Kevin Jonesna unti unting bumubuti mula nang halinhan si Josh Boone.
Ang Air 21 ay galing sa 87-82 pagkatalo sa Rain or Shine noong Lunes. Nais ng Express na magwagi sa hangaring hindi magtapos sa ikapito o ikawalong puwesto na magbibigay sa kanila ng twice-to-beat disadvantage sa No. 1 o No. 2 team.
