NLEX kontra Cagayan Valley

IPAGPAPATULOY ng NLEX ang pananalasa nito kahit na wala pa si head coach Teodorico Fernandez III at limang manlalarong nagtungo sa Lithuania noong nakaraang linggo

Puntirya ng Road Warriors ang ikalimang sunod na panalo kontra Cagayan Valley sa PBA D-League Foundation Cup mamayang 4 pm sa JCSGO Gym sa Quezon City.

Sa ibang mga laro ay magkikita ang Blackwater Sports at Derulo Accelero sa ganap na 10 ng umaga at magtutuos naman ang Jumbo Plastic at Hog’s Breath Cafe sa ganap na 12 ng tanghali.

Sina Fernandez at limang manlalaro buhat sa San Beda College ay nasa Lithuania para mag-training at paghandaan ang nalalapit na NCAA season kung saan nagtatanggol na kampeon ang Red Lions.

Ang paggiya sa Road Warriors ay iniwan kay Raymond Celis na hindi naman bumigo sa pagtitiwala sa kanya. Inihatid ni Celis ang NLEX sa 88-67 panalo kontra Cafe France noong Martes.

Sa larong iyon ay nagpugay para sa Road Warriors ang bago nilang manlalarong si Bobby Ray Parks na nakuha nila buhat sa Banco de Oro-National University na hindi lumahok sa torneong ito.

Nakabawi naman ang Cagayan Valley buhat sa masamang simula kung saan natalo sila sa unang dalawang games. Dinaig ng Rising Suns ni coach Alvin Pua ang Cebuana Lhuillier (70-67) at Derulo Accelero 76-74).

Ang Jumbo Plastic ni coach Stevenson Tiu ay may 2-1 karta. Hangad ng Giants na umakyat sa ikalawang puwesto at makasalo ang Cebuana Lhuillier.

Kabilang sa sinasandigan ni Tiu sina Mark Parala, Karl Dehesa, Jason Ballesteros, Elliot Tan at Jan Colina.

(SABRINA PASCUA)