Magsasaka, baboy todas sa koryente (Nagpaligo ng mga alaga)

CAUAYAN CITY, Isabela – Patay ang isang magsasaka nang tangkain saklolohan ang kanyang mga alagang baboy na nakoryente sa Brgy. Alunan, Quezon, Isabela.

Kinilala ang biktimang si Mark Jay Abon, 20, may-asawa, magsasaka at residente sa  nasabing lugar.

Si Abon ay nagtungo sa kanyang piggery ilang metro ang layo mula sa kanilang bahay upang linisin ang kulungan ng kanyang mga alagang baboy

Bago nagtungo ang biktima sa kanyang piggery ay binuksan niya ang daloy ng koryente upang magkaroon ng ilaw sa kulungan.

Pinaliguan ni Abon ang kanyang mga baboy gamit ang water hose at habang pinapaliguan ang mga alaga ay nakitang nangingisay ang mga alaga kaya’t kanyang sinuri.

Hindi batid ng biktima na may nakakonektang live wire ng koryente na sumagi sa metal division ng naturang piggery kaya pati siya ay nakoryente.

Dinala sa pagamutan ang biktima ngunit idineklarang dead on arrival.

9-ANYOS NANGISAY SA POSTENG BAKAL

LA UNION – Patay ang 9-anyos batang lalaki nang makoryente sa Brgy. Central East, Bauang, La Union.

Kinilala ang biktimang si Julius Huliganga, residente sa naturang lugar.

Sa impormasyon mula sa Bauang Municipal Police Station, nakita na lamang ng kanyang lola na nakahundasay ang biktima at hindi na gumagalaw.

Agad nagpasaklolo ang lola at dinala sa Ilocos Training and Regional Medical Center sa lungsod ng San Fernando ang apo, ngunit idineklarang dead on arrival ang biktima.

Ni BETH JULIA