2 anak ini-hostage ni tatay (Ayaw magbasa ng Koran)

DAHIL sa hindi pagsunod sa kagustuhang magbasa ng Koran ang kanyang dalawang anak na lalaki, nagalit at ginawa silang hostage ng kanilang ama, kamakalawa ng gabi sa Malabon City.

Kinilala ang suspek na si Jojo Mariano, 30-anyos, ng Katapatan st., Brgy. Muzon, ng nasabing lungsod na nahaharap sa kasong child abuse.

Ligtas na ang magkapatid na sina Michael Jojo,11,  at John Lloyd, 2-anyos, anak ng suspek na kanya ring  pinakawalan matapos ang mahinahong negosasyon.

Sa ulat ng pulisya, dakong 11:00p.m. kamakalawa, nang maganap ang insidente sa loob ng bahay ng mga Mariano  sa nasabing lugar.

Nauna rito, pinipilit ng suspek na magbasa ang dalawang anak ng Koran pero dahil pagod at gabi na ay tumanggi ang mga bata dahilan upang magalit ang ama na nagresulta sa hostage-taking.

Agad humingi ng tulong ang tiyahin ng mga bata sa mga awtoridad at mabilis ding napakalma ang suspek at pinakawalan ang dalawang anak.

(rommel sales)