HATAW! D'yaryo ng Bayan hatawtabloid.com
AGAD binawian ng buhay ang chief of staff ng board member ng lalawigan ng Bulacan makaraan pagbabarilin ng dalawang lalaking lulan ng motorsiklo habang minamaneho ang kanyang Bes-ta van sa Brgy. Longos, sakop ng bayan ng Calumpit, Bulacan kahapon ng umaga.
Tadtad ng tama ng bala sa katawan ang biktimang si Edwin Inocencio, 35, may-asawa, residente ng Brgy. San Sebastian, Hagunoy, Bulacan, chief of staff ni Provincial Board Member Majority Floor Leader Michael Fermin ng Unang distrito.
Batay sa inisyal na ulat ng pulisya, galing sa kanilang bahay ang biktima at magre-report sana sa nasabing bokal bilang bahagi ng kanyang trabaho.
Ngunit biglang nag-overtake sa kanyang minamanehong sasakyan ang isang motorsiklo at pagtapat sa bintana ng driver’s seat ay pinagbabaril ang biktima ng mga suspek dakong 8:30 a.m.
Ayaw pang magbigay ng konklusyon ang pulisya kaugnay sa motibo ng pagpaslang sa biktima hangga’t hindi pa natatapos ang kanilang imbestigasyon.
(DAISY MEDINA)
