19-anyos nalunod (Inanod na tsinelas hinabol)

CEBU CITY – Nalunod ang 19-anyos lalaki nang habulin ang tsinelas na tinangay ng malakas na alon.

Kinilala ang biktimang si Jason Maloloy-on.

Ayon sa Lapu-Lapu City Homicide Section, batay sa spot report ni PO3 John Carlo Jocutan, kahapon ng umaga nang matagpuan ang bangkay ng biktima na palutang-lutang sa ilalim ng Marcelo Fernan Bridge na nagdudugtong sa Cebu at Mactan Island.

Kamakalawa, umalis ng bahay ang biktima kasama  ang mga kaibi-gan at nagpaalam na maliligo sa dagat.

Habang masayang naliligo ang magbarkada ay inanod ang tsinelas ng biktima kaya kanyang hi-nabol.

Hindi namalayan ng mga kasamahan na ang biktima ay pumunta na sa malayong bahagi ng Mactan Channel.

Pagsapit ng dilim, hinanap nila si Maloloy-on ngunit hindi na nila natagpuan sa lugar.

Kinaumagahan, nakita na lamang na wala nang buhay at palutang-lutang sa dagat ang katawan ng biktima. (HNT)