Tutulungan ba tayo ng US?

MUKHANG patungo na sa hindi magandang kahihinatnan ang problema ng Pilipinas at China sa usapan ng West Phillipine Sea.

Ito ang nababanaag natin matapos magalit ang China sa ginawa ng ating pamahalaan na pagsasampa ng protesta sa UN.

Dito ngayon lumabas ang tanong na tutulungan ba tayo ng Amerika sakaling giyerahin na tayo ng China?

Ito ngayon ang problemang kinakaharap ng bansa dahil alam naman nating wala tayong kakayahang makidigma sa kahit sino pa mang bansa maging ito man ay maliit o dambuhala.

Alam natin ang kakayanan ng ating Sandatahang Lakas at alam na alam lalo natin na  wala tayong mga kagamitan pandigma , maging mo-derno man o hindi.

Dambuhalang bansa ang China at dito tiyak na mapapasubo ang tapang nating mga Pinoy pero hindi sapat ang tapang lang sa usaping ito.

Sa tao-tao pa lamang ay agrabyado na ta-yong hindi hamak kaya’t dito dapat tayong ma-niguro kung tutulungan tayo ng US at iba pa nating bansang kaalyado.

Kung sampu porsiyento ang basehan na patungo na sa paglala ang usapin sa West Philippine Sea ay mukhang masasabi na nating nasa 5 percent na ito kaya’t dapat na nating rebisahin kung anong tulong ang ibibigay ng ating mga kaalyado.

Baka tulong laway lang ang kanilang ibigay kaya’t dito dapat maging mapag-analisa ang ating mga lider sa Malakanyang dahil buhay ng tao at kasarinlan natin ang nakataya.

Dapat din pag-aralan ng pamunuang PNoy kung ginagamit lamang tayo ng US para pabagsakin ang isa sa kanilang kalaban dahil hindi naman lingid sa lahat na isa nang super power din ang bansang China sa kasalukuyan.

Alvin Feliciano