Definitely Great wagi sa PCSO

Nagwagi ang bagitong mananakbo na si Definitely Great ni Kelvin Abobo sa isang 3YO PCSO Special Maiden Race na nilargahan nung isang hapon sa pista ng Metro Turf sa Malvar, Batangas.

Sa largahan ay matulin na umarangkada si Cat’s Regal kasunod sina Think Again, Definitely Great, Misty Blue at Morning Time. Pagdating sa medya milya ay nasa harapan pa rin si Cat’s Regal, pero nagsimula nang maggalawan ang mga sakay nung apat na nasa likuran dahil baka makaporma iyong bandera.

Kaya pagtapat sa ultimo kuwarto ay nagkapanabayan na sa unahan, sabay biglang lusot sa gawing loob si Think Again at sabay na rin si Kelvin sa labas.

Pagsungaw sa rektahan ay nagpalitan sa harapan sina Think Again, Definitely Great at kumamot muli si Cat’s Regal. Subalit sa lakas ng ayuda ni Kelvin ay tinapos niya ang laban ng may dalawang kabayong agwat kay Cat’s Regal, pumangatlo si Think Again, pang-apat si Misty Blue at panglima si Morning Time.

Naorasan ang karerang iyan ng 1:10.6 (23’-21’-25’) para sa distansiyang 1,200 meters.

Fred L. Magno