Assets ng 3 senador binubusisi na ng AMLC

NAKIKIPAG-UGNAYAN na ang Anti-Money Laundering Council (AMLC) sa Department of Justice kaugnay sa “freeze order” laban sa mga ari-arian ng tatlong senador na idinarawit sa multi-billion peso pork barrel scandal.

Ayon sa ulat, kabilang sa hinihingi ng AMLC sa DoJ at National Bureau of Investigation (NBI) ang mga dokumentong magpapatibay sa ihahaing asset preservation order laban kina Sen. Juan Ponce Enrile, Bong Revilla at Jinggoy Estrada.

Una nang iginiit ni Justice Sec. Leila de Lima na marapat lamang mabawi ng gobyerno ang mga kuwestyonableng yaman ng mga akusado dahil bahagi ito ng kaban ng bayan.

“It is public funds, kaban ng bayan iyan, coffers ‘yan, national treasury ‘yan. So in the end, dapat i-recover ‘yan. That is part of the integral process of exacting justice in anti-corruption cases such as this, lalo na’t plunder,” ani De Lima.

Gayonman, nilinaw ng kalihim na kanilang ipinauubaya sa AMLC ang pagsagawa sa naturang hakbang.

Una rito, kinatigan ng Manila Regional Trial Court ang freeze order request ng AMLC laban sa mga co-accused ng tatlong mambabatas sa P10-billion PDAF scandal.

(LANI CUNANAN)