HATAW! D'yaryo ng Bayan hatawtabloid.com
INARESTO ng mga pulis ang mag-ina nang marekober sa kanilang compound ang dalawang karnap na sasakyan makaraan ireklamo ng concerned citizen kaugnay sa mabahong kemikal mula sa kanilang bahay sa Brgy. Catmon, bayan ng Sta. Maria, Bulacan.
Kinilala ng pulisya ang nadakip na mag-ina na sina Reynan Manuel, 29, at Juleta San Diego, 69, ng nasabing lugar.
Nauna rito, nagreklamo sa himpilan ng pulis-ya ang isang residente kaugnay sa mabahong kemikal na nagmumula sa compound ng mag-ina.
Ngunit nang pasukin ng mga pulis ang compound ay nagtangkang tumakas ang mag-ina.
Sa puntong ito, natuklasan ng mga awtoridad ang puting Nissan Frontier 4X4 at Toyota Land Rover na bagong pintura sa loob ng nasa-bing compound.
Nang beripikahin sa LTO ay napag-alaman na karnap ang dalawang sasakyan at ilang linggo nang nawawala makaraan iparada sa magkahiwalay na lugar sa Lungsod ng Angeles sa lalawigan ng Pampanga.
(DAISY MEDINA)
