HATAW! D'yaryo ng Bayan hatawtabloid.com
ni Jay Orencia
MASUWERTE ang pinakabagong alaga ng Kapamilya Network na si Julia Barretto. Kahit wala pang napatutunayan sa trabahong kinahiligan, isang malaking proyekto agad ang ipinagkatiwala sa kanya, anmg Mira Bella.
Pero, hindi dapat matuwa o maging kampante si Julia dahil isang malaking hamon sa kakayahan niya bilang artista ang Mira Bella. Dapat niyang patunayan na karapat-dapat siya bilang bida, lalo pa’t mahuhusay na artista ang kanyang pinanggalingan.
“Sobrang kabado po ako. Iniisip ko kasi kung masa-satisfy ang mga manonood, kung magre-rate ito at kung magugustuhan ito. So, I’m scared,” pagtatapat ni Julia.
Unang nabalita na Confradia ang una niyang proyekto, kapareha sana ang mga baguhang sina Kiko Estrada at Diego Loyzaga. At biglang naging Mira Bella na, na mas bagay sa kagandahan ni Julia.
“Nang mawala ang ‘Confradia’ at sinabing hindi na matutuloy ito, nalungkot ako. Akala ko nga, wala na talaga akong gagawin. Hanggang sa sinabing ‘Mira Bella’ na ang kapalit ng ‘Confradia’. Kaya, masayang-masaya ako,” kuwento ng batang Barretto.
Dalawang young actor ang kapareha ni Julia rito sina Sam Concepcion at Enrique Gil at hindi maiaalis na kasabikan ng kanilang mga tagahanga at mga manonood ang kissing scene. Kahit pa smack o halik lamang sa pisngi na magsisilbing kilig factor sa viewers. Pero, hindi pa raw ito magagawa ni Julia. “No kissing scene, bawal pa po,” sabi ng young actres. “I just turned 17, so hindi pa puwede.”
Kung sakaling 18 years na siya, puwede na kaya?
“Mahirap at saka bata pa po ako. Darating ang tamang panahon para riyan. Mag-eenjoy muna ako sa aking mga ginagawa bilang bata,” pahayag ni Julia.
