P5-B funds unliquidated 100 gov’t off’ls target sa asunto

AMINADO ang Commission on Audit (CoA) na matatagalan pa bago maisasampa ang kaso laban sa tinatayang 100 government officials kaugnay sa sinasabing “unliquidated cash advances” na pumalo sa mahigit P5 billion noong taon 2011.

Ayon kay CoA Chairperson Grace Pulido-Tan, masyadong masalimuot ang isyu, lalo’t malawak at marami ang mga sangkot na government officials, government agencies, NGOs at civil society organizations.

“It’s not as easy as sit down and make a complaint. You’re talking of so many millions of names and documents we have to prepare. You cannot just go to court. You have to make a pleading, complaint and attach all the documents so it’s not really easy.”

Una nang inihayag ni Tan na ang kinukwestyong pondo ay iba pa sa government funds na nasangkot sa kontrobersyal na multi-billion peso “pork” barrel scandal.

Dagdag ng opisyal, nakipag-ugnayan na sila sa Office of the Ombudsman kaugnay sa ginagawang imbestigasyon.

“We hope with what we’re doing, we’re sending the clear message to everyone that you cannot get away with this forever. Some may be able to get away pero kailangan ding managot,” ani Tan.

Bagama’t tumangging tukuyin ang pagkakakilanlan ng mga opisyal na sangkot sa iskandalo, inamin ng CoA head na may ilan sa kanila ay nakaladkad na rin ang pangalan sa maanomalyang paggamit ng Priority Development Assistance Fund (PDAF).

(KARLA OROZCO)