Petilla out!

TAMA lamang ang rekomendasyon ni Senador Serge Osmeña kay PNoy na patalsikin na sa Gabinete si Energy Sec. Jericho Petilla dahil lalong lumala ang problema ng kakulangan ng suplay ng kuryente sa bansa.

Malinaw kasi sa mga ikinikilos ni Petilla na hindi ito sa bihasa sa usapin ng enerhiya at maging sa pamamalakad ng naturang kagawaran kaya’t nagkawindang-windang ang suplay ng kuryente sa bansa lalo na sa bahagi ng Mindanao.

Maging ang usapin ng pagnenegosyo sa bansa ay namimiligro dahil bukod sa  malinaw na nasa atin ang pinakamahal na singil ng kuryente sa buong Asya ay hindi pa stable ang suplay nito.

Sa kasalukuyang nangyayari sa Mindanao ay lumalabas na bagsak na ang negosyo sa naturang lugar dahil umaabot sa mahigit na anim na oras ang brownout araw-araw.

Kapansin-pansin din ang kawalan ng plano at drastikong programa ng gobyerno sa pagresolba ng energy crisis kaya’t tiyak na lulubha pa ang naturang problema dagdag pa ang lider ng DoE ay isang pulitiko na ang pokus ay pulitika.

***

Ibang klase raw itong bagong mayor ng Caloocan City.

Aba’y may balita kasing benta rito at benta ruon na raw ang ginagawa ni Mayor Oca Malapitan sa mga pag-aari ng siyudad.

Kung noon ang mga dating naging alkalde ay nagsumikap na mapakapagpundar ng mga lupa at pag-aari ay kakaiba naman daw ang istilo ni Mayor Oca dahil isinasalya raw nito ang mga pwedeng ibenta sa ari-arian ng lungsod.

Kakaibang ang ginagawa ni Malapitan kaya’t ito ang inyong abangan dahil ito ang ating hihimayin sa mga susunod natin pitak.

Alvin Feliciano