HATAW! D'yaryo ng Bayan hatawtabloid.com
LEGAZPI CITY – Nauwi sa madugong away ang masayang inoman ng magkapitbahay na pares ng mag-asawa sa Sitio Bagong Sirang, Brgy. Panique, Aroroy, Masbate.
Kinilala ang mga sugatan na sina Ricardo Gongje, Jr., Joseph Escoto, 35, at misis niyang si Dina Escoto, pawang may mga tama ng baril at saksak sa kanilang katawan.
Agad binawian ng buhay sa pinangyarihan ng insidente ang live-in partner ni Gongje na si Evelyn Brioso.
Sa imbestigasyon, nag-iinoman ang apat nang magtalo ang dalawang lalaki dahilan para umuwi ang suspek na si Escoto sa kanilang bahay.
Makalipas ang ilang minuto ay bumalik si Escoto, may bitbit na homemade shotgun at naghamon ng duelo saka agad pinaputukan ang mag-asawang Gongje at Brioso.
Hindi napuruhan si Gongje na gumanti gamit ang itak.
Tinamaan sa iba’t ibang bahagi ng katawan ang suspek kaya sumaklolo ang kanyang misis na kumuha rin ng itak.
Bagama’t sugatan sa taga ay patuloy pa rin sa pagpapaputok si Escoto.
Narekober sa crime scene ang baril at dalawang itak na ginamit ng apat sa kanilang duelo.
