SUV swak sa ilalim ng bus (2 sugatan)

Dalawa ang sugatan matapos pumailalim ang isang sasakyan sa likurang bahagi ng bus sa EDSA – Guadalupe southbound sa Makati City, Miyerkoles ng madaling araw.

Sa ulat ni  MMDA traffic constable Melencio Martinez, bumangga sa likurang bahagi ng Admiral transport bus ang isang Innova SUV. Ayon sa mga awtoridad, lasing ang  drayber ng Innova na pumailalim sa bus at naipit sa loob ng sasakyan.

Nahirapang tanggalin ng rescue team ang drayber sa loob dahil sa tindi ng pagkakaipit at umabot nang halos isang oras bago naalis sa pagkakaipit saka isinugod sa ospital.

Ang kasamang babae ng driver ng Innova ay naunang isinugod sa isang ospital.

Bagama’t idinepensa ng drayber ng bus na si Jomar Galme ang insidente, sinabi ni SPO1 Andy Vale, posibleng sampahan ang driver  ng kaso, matapos walang makitang driver’s license si Galme at tanging traffic violation ticket lamang ang  kanyang ipinakita.