P1.2-T tax case vs Lucio Tan inaalam ng Palasyo

INIUTOS ng Malacañang sa Bureau of Internal Revenue (BIR) na alamin kung ano na ang status ng tax evasion case laban kay Lucio Tan ng Fortune Tobacco Corp., Tanduay Distillers, Asia Brewery at Allied Bank.

Magugunitang 2011 pa isinampa ni Danilo Pacana, dating internal audit manager ng Allied Bank, ang P1.2 trillion tax evasion case sa BIR at hanggang ngayon ay wala pang desis-yon.

Sinabi ni Presidential Spokesman Edwin Lacierda, aalamin nila kung ano na ang update sa kaso kasabay ng katiyakang walang sisinuhin sa dapat panagutin.

Ayon kay Lacierda, lahat ng taxpayers ay binubusisi ng BIR at hindi lamang mga kilalang personalidad.

Dumistansya naman ang opisyal sa multi-billion tax evasion case laban kay Tan na nabasura dahil hindi pa raw nila panahon nang ito’y maibasura sa korte.