2-anyos paslit napisak sa backhoe

KALIBO, Aklan – Kalunos-lunos ang sinapit ng 2-anyos lalaking paslit matapos magulungan ng backhoe habang nasa gilid ng kalsada sa Banga, Aklan kamakalawa.

Kinilala ang biktimang si Gian Zausa, residente ng naturang lugar.

Ayon kay PO1 Neptali Hao ng Banga Police, hindi namalayan ni Vivian Sauza, lola ng biktima at nagbabantay sa kanyang apo, na nakalabas ang bata sa kanilang bakuran at nakatakbo sa kalsada.

Base sa impormasyon, umiwas ang driver ng backhoe sa kasalubong na SUV dahilan para mahagip ang bata sa gilid ng kalsada.

Todo ang pagtanggi ng driver ng backhoe na si Francisco Tim-oc, 54, residente ng Floridablanca, Pampanga, na may nasagasaan siyang bata.

Ayon sa kanya, hindi niya namalayan ang pangyayari dahil masya-dong mataas ang kanyang sasakyan at nakasarado.

Ayon sa pulisya, ang backhoe ay pag-aari ng BSP and Company Inc.

Nakakulong na ngayon driver at nakatakdang sampahan ng kaukulang kaso.

(BETH JULIAN)