Ama ng komedyante pinatay sa Quezon

NATAGPUANG patay ang ama ng komedyanteng si Jeffrey Tam sa Quezon province kamakalawa.

Si Alfredo Francisco Tam, 67, ay natagpuang wala nang buhay sa gilid ng kalsada sa boundary ng Tayabas City at Lucena City dakong 2:30 p.m.

Ayon sa Tayabas Police, ang bangkay ng biktima ay ibi-naba sa gilid ng kalsada ng dilaw na Isuzu Crosswind.

May natagpuan ang mga imbestigador na marka ng gulong sa kalsada, palatandaan na sinagasaan ang biktima ng nabanggit na sasakyan.

Ang nasabing sasakyan na pagmamay-ari ng biktima ay natagpuan sa Brgy. Mayao Crossing sa Lucena.

Sinabi ng pulisya na may mga talsik ng dugo ang loob ng sasakyan. Natagpuan din sa loob ng sasakyan ang heavy-duty wire cutter na hinihinalang ginamit sa pagpatay sa biktima.

Umapela ang nakababatang Tam, na nagdadalamhati pa sa pagkamatay ng kanyang  kaibigang kapwa komed-yante na si Arvin “Tado” Jimenez, ng dasal para sa kanyang ama.

“Wala na po akong hinihiling kung hindi ipagdasal n’yo ang aking ama. Pilit kong sinasabi sa sarili ko, ‘Kung maga-ling kang madyikero, buhayin mo ang tatay mo.’ Hindi ko magawa, hindi ko po magawa,” pahayag ng umiiyak na si Tam. (HNT)