Nene hinalay, pinatay ng ex-con

HINALAY muna bago pinatay ang 9-anyos na batang babae na natagpuan sa isang bakanteng lote malapit sa bahay ng suspek na ex-convict, na itinuturong may kagagawan ng krimen, kamakalawa ng gabi sa Taguig City.

Kinilala ng pulisya ang biktimang si Marian (real name Crissa Ann Marasigan), Grade 3 pupil, ng Bagong Sikat, Brgy. Sta. Ana, ng lungsod.

Sa isinagawang operasyon ng mga operatiba ng Police Community Precinct (PCP-5) ng Taguig Police, naaresto sa kanyang pinagtatrabahuan ang suspek na si Mario Cruz, 33-anyos, binata, residente rin ng naturang lugar.  Si Cruz ay dating nakulong dahil sa kasong panghahalay.

Sa ulat ng pulisya, sinabi ng ina ng biktimang si Alma, inutusan niya ang anak bago mag 7:00 ng gabi na bumili ng diaper para sa kanyang kapatid na sanggol.

Mag-iisang oras na ay hindi pa bumabalik ang anak na si Marian kaya nagpasya silang hanapin ito.

Nang hindi matagpuan, nagpasya na siyang humingi ng tulong sa mga barangay tanod kung saan tulong-tulong na naghanap sa bata hanggang sa matagpuan ito sa isang bakanteng lote na wala nang buhay sa tapat ng bahay ng suspek na si Cruz.

Wala naman sa loob ng bahay ang suspek kaya nagsagawa na ng manhunt operation ang pulisya na nagresulta sa pagkadakip  kay Cruz.

Sa pulisya itinanggi naman ni Cruz na pinatay niya ang paslit.

(JAJA GARCIA)