Talunang Tserman niratrat tigbak

AGAD binawian ng buhay sa Chinese General Hospital ang isang barangay chairman matapos pagbabarilin habang nasa labas ng kanyang bahay sa Tondo, Maynila kamakalawa.

Kinilala ang biktimang si Armando Ramos ng Brgy. 209, Zone 19 ng Severino Reyes St., Tondo, Maynila, habang patuloy ang pangangalap ng testigo para sa pagkakakilanlan sa tumakas na suspek.

Ayon sa ulat ng pulisya dakong 9:00 ng gabi nang pagbabarilin si Chairman Ramos sa harap mismo ng kanyang bahay.

Sunod-sunod na putok ng baril ang narinig ng ilang residente sa nasabing lugar, at nang humandusay sa semento si Chairman Ramos, dali-dali siyang isinugod sa Chinese General Hospital pero hindi na umabot nang buhay, dahil sa tama ng bala sa ulo at sa katawan.

Kasalukuyang barangay Chairman si Ramos at nitong nakaraang barangay election ay minalas na matalo laban kay Rudy Cruz, may-ari ng Cruz Funeral Parlor.

Inaalam pa ng mga awtoridad ang pagkakakilanlan ng suspek at ang motibo ng krimen.

(LEONARD BASILIO)