HATAW! D'yaryo ng Bayan hatawtabloid.com
TODAS ang isang 23-anyos na service crew ng Chowking dahil sa malakas na suntok mula sa kanyang nakaaway sa Sta. Cruz, Maynila iniulat kahapon.
Kinilala ang biktimang si Junnel Samson, ng 832 Oroquieta St., Sta Cruz, Maynila.
Inilarawan ang dalawang suspek na may edad 25-20, kapwa nakatakas.
Ayon sa ulat dakong 1:15 ng madaling-araw kahapon nang naganap ang insidente sa kanto ng Claro M. Recto Ave., at Oroquieta St., Sta Cruz, Maynila.
Nabatid na kumakain ang biktima kasama ang kanyang pinsan na si John Samson nang abutan sila ng mga suspek na nagsalita ng “suwerte naman, may magbabayad na sa kakainin natin.”
Sumagot naman ang biktima ng “bakit ako magbabayad ng kinain n’yo, kaibigan ko ba kayo?”
Sa puntong ito ay nagkaroon ng mainitang pagtatalo ang mga suspek at biktima.
Namagitan si Samson ngunit huli na nang pagsusuntukin ng mga suspek ang biktima na bumagsak sa semento at nabagok.
Humingi ng saklolo sa ama ng biktima si Samson pero pagbalik nila ay nakahandusay na si Junnel kaya isinugod nila sa ospital.
Nabatid na napuruhan ang biktima sa malakas na suntok ng mga suspek na agad niyang ikinamatay.
(leonard basilio)
