Customs collectors, bakit ibinabartolina sa Bangko Sentral ng Pilipinas!? (Ito ba ang tuwid na daan?)

ITO raw ang pinakamasaklap na panahon sa kanilang karera bilang mga Customs Collector. ‘Yan po ang hinaing at reklamong natanggap ng inyong lingkod. Nitong nakaraang linggo kasi, napasyal tayo sa Pier (POM) at hindi sinasadyang nakasalubong natin ang isang customs collector na kasama sa 27 Collectors na ibinalibag sa non-existent Customs Policy and Research Office (CPRO) Department of Finance.

By the way, ang nakausap kong Collector ay hindi kasama sa mga pumirma at nag-file ng TRO. Ang CPO (customs personnel order) at EO (executive order) ay ‘yung reshuffle sa 27 customs collectors kaugnay nga ng repormang isinusulong ni Commissioner Ruffy Biazon sa Bureau of Customs alinsunod sa atas ng Malacañang.

Pero batay sa pagkukuwento ng customs collector na nakahuntahan natin, sila raw ay naging ‘sacrificial lamb’ sa repormang itinutulak sa kawanihan na kanilang pinagsilbihan sa buong buhay ng kanilang karera sa public sector.

Ang una nilang hinaing, nang tanggapin nila nang walang pagtutol ang pagtatalaga sa kanila sa Customs Policy and Research Office (CPRO), inakala nilang sila ay ilalagay sa isang opisina na ang trabaho ay may kaugnayan sa research and policy making sa BoC. S’yempre nga naman, sa kanilang mga dating pwesto, sila ay mga bossing na mayroong minamanehong opisina at sinu-supervise na tao. Pero sa ‘opisinang’ pinagdalhan (hindi sa Department of Finance building) sa kanila, nakita umano nila kung paano sila ‘hinubaran’ ng posisyon, tinanggalan ng trabaho at ‘ikinulong’ na parang preso.

Ang ‘opisina’ na inaakala nila ay doon pala sa isang top floor at sulok na animo’y bodega ng Bangko Sentral ng Pilipinas (BSP) sa Roxas Blvd. Pagpasok niya sa nasabing kwarto, nagulat siya dahil hindi mukha ng isang opisina ang kanyang nakita kundi isang tila bodega. Mayroong dalawang mesa na walang drawer, mayroong monoblock chairs, walang computer, walang typewriter o walang kahit anong equipment na pwedeng tawaging opisina.

Araw-araw ay kailangan mong dumaan sa 3 X-ray walk detector machine, hindi pa kasama riyan ang physical frisking. Alam naman n’yo siguro kung gaano kahigpit ang security ng BSP. Dagdag pa riyan na kailangan nilang mag-biometrics finger scanner para sa daily time record. Oras na pumasok sila ay hindi pwedeng pagala-gala sa BSP building. Eksakto alas-dose ang lunch break at kailangan bumalik sila ng ala-una ng hapon. Naroon din ang iba pang tinamaan ng CPO. Nakaupo lang sila, walang ginagawa sa buong maghapon kundi ang maghuntahan, tumunganga at maidlip. Walang instruction o direction kung ano ang gagawin nila … kung sila ba ay Customs collector pa ba o biglang naging researcher? Daig pa nila ang inilagay sa ‘TORTURE CHAMBER.’

Sa buong panahon ng kanilang panunungkulan sa public sector ngayon lang umano nila naranasan ang ganyang klase ng ‘pagmamaliit’ sa kanila gayong hindi maikakaila na sila ay naging katuwang din ng pamahalaan para sa paglikom ng koleksiyon na ipinapasok sa national treasury.

Ngayon pa sa ilalim ng pamahalaan na may slogan na ‘DAANG MATUWID.’ Kung talaga umanong hindi satisfied sa kanila ang administrasyong may ‘daang matuwid’ sana raw ay nag-offer na lang sa kanila ng early retirement package, o kaya sinibak na lang sila, o kaya naman ay kinasuhan sila kung sa tingin nila ay dapat silang sampahan ng kaso.

Tsk tsk tsk …

Talaga naman nabagbag ang damdamin natin sa emosyonal na pagkukuwento ng nasabing customs collector. Napakasakit na kahit pala CESO holder ka o abogado ay wala palang garantiya na may security of tenure ka sa BoC. Lumalabas na hindi pa nga raw makaTAO ang trato sa kanila ngayon.

Kaya mas maigi at tama pa nga raw ang ginawa ni customs collector Imelda Cruz na nag-RESIGN na lang kaysa naman ma-damage ang pagkatao mo, mawala ang self-esteem mo o tumunganga lang sa ‘TORTURE CHAMBER.’

Hindi lang daw ‘yan. Sa mga susunod na araw ay may balita na may darating pang mga BoC division chiefs na tatamaan din ng CPO at doon din itatapon sa nasabing ‘TORTURE CHAMBER.’

God Forbids…

MAKUPAD SI JUSTICE SECRETARY LEILA DE LIMA SA KASO NI MA’AM ARLENE

NAGKAKANDAKUMAHOG si Justice Secretary Leila De Lima na kanselahin ang passports nina senators Johnny Ponce Enrile, Bong Revilla, Jinggoy Estrada at 37 iba pa na sangkot umano sa P10-billion pork barrel scam.

At ‘yan daw ay may basbas ng Palasyo, kaya naman pursigido si Justice Secretary De Lima na tanggalan ng pasaporte ang tatlong senador at iba pa.

Ang ipinagtataka lang natin, bakit MAKUPAD si Justice De Lima sa pag-aksyon naman laban sa Napoles ng JUDICIARY na si Arlene Angeles Lerma a.k.a. Ma’am Arlene.

Pumutok na ang balitang pinaiimbestigahan ng Supreme Court si Ma’am Arlene pero hindi pa agad ipinalagay sa lookout bulletin sa Bureau of Immigration kaya nakapuslit pa nitong October 16.

Samantala, sa ibang kaso ay napakatulin umaksiyon ni Secretary De Lima.

Aba, mukhang nakaabot na rin ba ang kamandag ni Ma’am Arlene sa Department of Justice (DoJ)?

Mukhang may naaamoy tayong malansa rito Madam Leila?!

Supreme Court Associate Justice Marvic Leonen, mukhang may pangangailangan na madaliin ninyo ang isinasagawang imbestigasyon laban sa tinatawag na ‘bigtime court fixer’ at ‘decision broker’ na si Ma’am Arlene.

Bilis-bilis din kapag may time, Associate Justice Leonen!

ELECTION PROCESS SA BANSA BULOK NA BANG TALAGA?

AS usual, bumaha na naman ng flying voters at sandamakmak ang vote buying sa ginanap na barangay elections kahapon.

Lalo na sa Maynila, sa Tondo kitang-kita ang hakutan ng mga aswang na botante.

Maraming botante rin ang hindi nakaboto dahil hinaharang umano sila ng mga tauhan ng kandidatong hindi nila iboboto.

Nagtataka tayo kung saan pa kumukuha ng ‘FLYING VOTERS’ ang ilang kandidato.

Pero natuklasan natin kahapon na karamihan pala sa ‘FLYING VOTERS’ ay ‘yung RELOCATEES  na na-DEMOLISHED sa depressed areas at dinala sa mga relocation areas.

Dahil hindi pa sila nairerehistro sa bagong lugar nila, sila ay hinahakot ng mga politiko para gamiting ‘flying voters.’

Hindi ba naisip man lang ‘yan ni Commission on Elections (Comelec) Chairman SixTONG este Sixto Brillantes?!

Hindi ba’t malinaw na VOTE BUYING at FLYING VOTERS ‘yang mga ‘yan?!

Mukhang walang alam gawin si Brillantes at ang kanyang spokesman na si Director James Jimenez kundi ang dumakdak lang.

Mukhang tinamad na silang mag-isip kung paano sosolusyonan ang mga problemang ‘yan para IANGAT ang ELECTION PROCESS sa bansa.

Ayon nga kay Comelec Commissioner Guia: “Most of the complaints are related to vote-buying, unlawful electioneering. These are things we will act upon.”

Kelan kaya?!

Para sa mga reaksiyon, suhestiyon, reklamo at sumbong, magtext sa 0915.804.76.30 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com