Sole probe vs Ma’am Arlene mas gusto ng SC (Walang tiwala sa NBI)

IPINAWALANG-BISA ng mga mahistrado ng Korte Suprema ang utos ni Supreme Court Chief Justice Maria Lourdes P. Sereno na imbestigahan ng National Bureau of Investigation (NBI) ang sinasabing  fixer sa korte na isang Ma’am Arlene.

Nagpasya ang mga mahistrado na ang SC en banc na ang magsagawa ng imbestigasyon sa  paglutang ng pangalang Madam Arlene na sinasabing malakas ang impluwensiya sa hudikatura o tinaguriang “court fixer.”

Sa ginanap na en banc session ng mga mahistrado nitong Oktuber 17,  nagtalaga ng  committee na pamumunuan ni SC Associate Justice Marvic Leonen ang imbestigasyon sa kontrobersiya.

Kaugnay nito, ipinag-utos ng SC en banc na pagsama-samahin  ang lahat ng  resulta ng mga ginagawang parallel investigation  hinggil sa naturang usapin at isumite  sa komite na pinamumunuan ni Justice Leonen.

Kabilang sa mga nag-iimbestiga ang  Office of the Court Administrator na pinamumunuan ni Jose Midas Marquez, ang DoJ-NBI probe at maging ang imbestigasyon ng Court of Appeals na iniutos ng Presiding Justice.

Noong nakaraang linggo, unang hiniling ni Chief Justice Maria Lourdes Sereno kay Justice Secretary Leila de Lima ang tulong para imbestigahan ang sinasabing Arlene.

Sa kautusan kamakailan ni Sereno, dapat maisailalim sa “lifestyle check” ang mga judges at court employee. (LEONARD BASILIO)