HATAW! D'yaryo ng Bayan hatawtabloid.com
BIGONG mabawi ng mga guro sa pampublikong paaralan sa Lungsod ng Pasay ang tinapyas na P2,300 mula sa kanilang Cost of Living Allowance (CoLA) na dati na nilang tinatamasa sa panahon pa ng mga nakaraang administrasyon, bago ang pamamahala ni Mayor Antonino Calixto.
Kamakalawa, nilusob ng galit na mga guro ang tanggapan ni Mayor Calixto para komprontahin sa ginawang pagtatapyas sa kanilang buwanang allowance na dating P3,500 ay naging P1,200 na lamang.
Sa naturang paghaharap, hindi sumipot ang kinatawan ng Commission on Audit (CoA) na itinuturo ng lokal na pamahalaan na may pakana sa pagtatapyas, samantala, ang nasabing karagdagang halaga ay mula sa pondo ng Special Education Fund na galing sa porsiyento ng real estate taxes mula sa mga mamamayan ng lungsod.
Sa halip, naghugas ng kamay ang alkalde sa mga pinuno at miyembro ng Pasay Public School Teachers Association (PPSTA) at sinabing magpadala ng sulat sa CoA at siya mismo ang magdadala upang matuldukan ang usapin.
Matatandaang, naunagkilos-protesta ang mga guro sa harapan ng city hall noong nakaraang linggo upang hingan ng paliwanag ang alkalde kung bakit pinahintulutan ang pagtatapyas sa kanilang dating tinatanggap na CoLA.
Mula sa dating natatanggap na P3,500, naging P1,200 noong Agosto at hindi pa nasusundan para sa buwan ng Setyembre.
Ayon kay Salvador Albortra, pangulo ng PPSTA, wala sa general fund kundi nasa ilalim ng Special Education Funds na nagmula sa isang porsiyento ng real property tax ang para sa CoLA kaya’t walang dahilan upang ito ay tapyasan.
Ikinakatuwiran naman ng lokal na pamahalaan na ang hindi pagbibigay ng pahintulot ng CoA ang dahilan kaya’t ipinasiya nilang tapyasan ang allowance para sa mga guro.
May umiiral umanong panuntunan ang CoA sa tamang halaga na ibabahagi bilang CoLA at sinusunod ito ng alkalde.
Sa panig ng PPSTA, may desisyon na ang Korte Suprema sa naturang usapin kaugnay sa kasong Judge Thomas Leynes vs CoA na kinatigan ang petitioner at idineklarang null and void ang desisyon ng CoA.
Bukod sa mga guro, ilang mga pulis at jail guard na dating nabibiyayaan ng allowance ang nagreklamo rin dahil sa atrasado nilang allowance na dating natatanggap mula sa lokal na pamahalaan.
(JAJA GARCIA)
