HATAW! D'yaryo ng Bayan hatawtabloid.com
HALOS magkadurog-durog ang dump truck (UMB-943) nang banggain ang gasolinahan na agaran ikinamatay ng driver na si Ramon Gabayan, 57, at ng gasoline boy na si Jonathan Maquel habang kinakargahan ng gasolina ang isang close van (RHP-181) sa McArthur Highway, Karuhatan, Valenzuela City. (RIC ROLDAN)
DALAWA ang patay habang dalawa pa ang malubhang nasugatan matapos sumalpok ang isang dump truck sa isang gasolinahan sa Valenzuela City kahapon ng madaling araw.
Dead on the spot ang driver ng dump truck (UMB-943) na kinilalang si Ramon Gabayan, nasa hustong gulang ng Plaridel, Bulacan sanhi ng pagka-ipit at pagkasunog ng buo niyang katawan habang natumbahan at nadaganan ng dispenser ng gasolinahan ang gasoline boy na si Jonathan Maquel na agad niyang ikinamatay.
Ginagamot sa Valenzuela General Hospital (VGH) sina Raymond Pulay, pahinante ng truck, at ang cashier ng Shell gasoline station na si Tomas dela Roma na kasalukuyang nagpapagaling dahil sa mga sugat at lapnos sa katawan.
Isa pang van na nagpapakarga ng gasolina ang nasunog nang magliyab ang gasoline station na agad naapula ng mga bombero.
Sa ulat ng pulisya, dakong 2:00 ng madaling araw nang banggain ng dump truck ang gasolinahan sa kahabaan ng McArthur Highway, Brgy. Karuhatan.
(Rommel Sales)
