HK media pinalayas sa APEC coverage (Binastos si PNoy)

BALI, Indonesia – Pinanindigan ng APEC Organizing Committee ang pagtanggal sa accreditation o access ng siyam miyembro ng Hong Kong media.

Nag-ugat ito sa paninigaw ng tatlo nilang journalists habang papasok si Pangulong Benigno Aquino III sa APEC CEO Summit.

Pilit nilang tinatanong ang Pangulong Aquino hinggil sa Manila hostage crisis na maraing Hong Kong nationals ang napatay.

Kabilang  sa mga apektadong mamamahayag ay galing sa Now TV, RTHK at Commercial Radio.

Sinabi ni Gatot Dewa Broto, ang Indonesian communications ministry official na in-charge sa APEC media center, hindi katanggap-tanggap ang ganitong asal ng mamamahayag na mistulang nagpoprotesta na.

“We deemed it improper for media to act that way, as they didn’t talk normally but they were very demonstrative, like they were protesting,’’ ani Broto.

Sinabi naman ni Communications Sec. Ricky Carandang, lumagpas ang nasabing mga mamamahayag sa ethical boundary.

“As a former journalist I know what it’s like to aggressively question a subject,’’ ani Carandang. “The behavior of these reporters crossed the line from mere questioning to heckling, and was even construed by Indonesian security personnel assigned to the president as a potential physical threat to him.”

HATAW News Team