HATAW! D'yaryo ng Bayan hatawtabloid.com
HINDI pabor ang Malacañang sa shoot-to-kill order laban kay Moro National Liberation Front (MNLF) leader Nur Misuari, kasalukuyang tinutugis ng mga awtoridad kaugnay sa paglusob sa Zamboanga City.
“We do not certainly abide by the shoot on sight or ‘yung shoot-to-kill order. So I will leave the rest [of the plans] to the [Philippine National Police] on the ground,” pahayag ni Deputy Presidential Spokesperson Abigail Valte kahapon.
Gayonman, kinompirma niyang mahigpit nang binabantayan ng mga tropa ng militar ang exit routes na maaaring daanan ni Misuari sa kanyang pagtakas palabas ng bansa.
“Kasama, siyempre, sa kanilang paghahanda at sa kanilang pagpaplano ‘yung pag-iisip no’ng mga posibleng maging susunod na hakbang kaya ina-anticipate po din nila ‘yung ganitong mga bagay,” aniya.
Nang itanong kung humingi na ang gobyerno ng tulong sa Malaysia sakaling doon tumakas si Misuari, sinabi ni Valte na hindi pa ito tinatalakay at nakatuon pa ang mga awtoridad sa local front.
Inianunsyo ng Palasyo nitong nakaraang linggo na tapos na ang krisis sa Zamboanga bagama’t patuloy ang clearing operations ng mga awtoridad. (ROSE NOVENARIO)
