Ravena imbitado sa SEA Games

KINOMPIRMA ng pambato ng Ateneo Blue Eagles na si Kiefer Ravena na imbitado siya sa pambansang koponan na sasabak ni coach Jong Uichico sa men’s basketball ng Southeast Asian Games sa Myanmar sa Disyembre.

Dating manlalaro si Ravena sa Sinag Pilipinas ni coach Norman Black na nagwagi ng gintong medalya noong 2011 sa SEA Games sa Vietnam.

Bukod kay Ravena, kasama rin sa national team sa SEAG sina Chris Newsome ng Ateneo, Terrence Romeo ng Far Eastern University, Bobby Ray Parks ng National University, Raymond Almazan ng Letran, at ang mga cadets na sina Kevin Alas, Ronald Pascual, Garvo Lanete, Jake Pascual, Matt Ganuelas at RR Garcia.

Inaasahan ding idadagdag si Marcus Douthit na naging bahagi ng Gilas Pilipinas na tumapos sa ikalawang puwesto sa FIBA Asia Championships na ginanap sa Maynila noong Agosto.

Sinabi ni Uichico na magsisimula ang ensayo ng kanyang national team sa Oktubre 14.  (James Ty III)